Aantu yandje ngele taa galikana ndje e tayi itedhulula notaa pilamene uuwinayi mboka yewu ningile, nena otandi ya uvu megulu, te dhimi po oondjo dhawo e tandi ya uvu megulu, te dhimi po oondjo dhawo etandi hepulutha ishewe oshilongo shawo (2 Ondjalulo 7:14-15)
Oondjo ohadhi tu manga ngiini?
Oshinima shimwe hashi nyanyudha tate Kalunga noonkondo osho omuntu ha longo uuyuuki nomunashili. Omutondi saatana okushi nawa kutya tate Kalunga okutonde shike na oshinima shimwe hashi nyanyudha omutondi saatana noonkondo osho okutala omuntu talongo uulunde, oshoka elalakano lye olyo oku eta etopoko pokati komuntu naKalunga ngaashi ali eshi ningile Adam na Eva, osho eli ta longo sigo onena.
Aantu yomuuyuni wonale oyali haya yambele Omwa omafikilondjambo, giinamwenyo, ngaashi oonzigona nenge oontana ndhoka oondjelipa. Oshiholelwa otatu shi mono kuJob ngoka ali omuyuuki noha vulika kuKalunga nokwali ha yambele Omwa ontselelandjambo ethimbo kehe oyana yaninga iituthi yawo nedhiladhilo kutya pamwe oyana oya yono nokusheka Kalunga (Job 1:5-6). Ihe tse otwa palelwa ondjila kuJesus Kristus, naashi tate Kalunga a hala kutse osho okukonga oshilongo she nuuyuuki washo (Mateus 6:33).
Mbela omolwashike tuna okuhempulula oondjo dhetu?
Otuna okuhempulula oondjo dhetu ethimbo alihe oshoka otuli oluvalo lwa Adam naEva, nohatu yono esiku kehe na ishewe molwashono tuli aantu yonyama nombinzi. Mokuhempulula oondjo dhetu ohatu iyogo opo tu vule okuholoka koshipala shaTate Kalunga tu gandje omaindilo getu. Oondjo dhetu ohadhi tu nyateke nohadhi imbi tate Kalunga a uve nokuyamukula omagalikano getu uuna tatu mu indile (2 Ondjalulo 7:14-15). Nolundji uuna tuli muulunde Ombepo ye Ondjapuki ihayi kala po putse, ohatu yi nikitha uuthigwa nokuyona kwetu. Ngaashi oohapu tadhi ti: hedheni kuKalunga, ye nota hedha kune. Yelitheni iikaha yeni, ne aalunde. Opalekeni omitima dheni ne aafudhime (Jakop 4:8).
Omutondi saatana okwahala Ombepo yaKalunga yikale kokule natse negameno lye li zepo putse, opo a vule okutu nyanyagula nawa ngaashi a hala. Ano oondjo inaadhi hempululwa nenge onkalamwenyo yaana evuliko ohayi pe saatana uuthemba wuudha okuyona po omaliko getu nokuhanagula po ashihe shoka twa pewa kutate Kalunga. Mokuyona kwetu saatana oha mono ompito yoku kuna oombuto dhe momalutu getu, moondjokana dhetu, momaluvalo getu, osho wo momazimo getu ngaashi: uuwehame, omupya, okulonga nuudhiginini ihe kapuna ondjambi yasha tovulu oku ulika, eshunomonima, etindo shaampoka toyi, omaluvalo ga tangalala, esithahoni, uuhugunini mushaashoka to ningi, oluhepo, uutondwe nosho tuu. Ngele tatu vulika kuKalunga, saatana oha kala u uvite nayi oshoka otwemu patela kondje yoonkalamwenyo dhetu, nenge a kale a hala oku kuna uuwinayi moonkalamwenyo dhetu ita vulu oshoka omiyelo adhihe odha pata.
Mondjokonona yOmbiimbeli aantu ayehe mboka yai haya dhiginine ompango yOmwa oyali ya yambwekwa nomaliko ogendji. Oshiholwa Job, Abraham, Noah, Gideon, Josua nosho tuu. Nangoye ngele owa kala omuvuliki kutate Kalunga no wuna eitaalo nowemu inekela nena omayambeko otaga kungulukile kungweye nokoluvalo lwoye (Psalm 1:1-3). Kapena shoka hashi nyanyudha Omwa shi vule omuntu omuvuliki kuye. Sho osho ta popi moohapu dhe tati: Manga nokuli inaaya galikana, otandi ya uvu, nomanga inaaya indila ndje, otandi ya yamukula (Jesaya 65:24)
Onkatu yotango okuhempulula oondjo oyini?
Jesus Kristus okwetu ningila ondjila ompu oshoka okwetu shunithile ekwatathano lyetu natate Kalunga ndyoka lyali lya yonwa po kuAdam naEva. Ombepo yi ishonopeka oyo nomutima gwi itedhulula, (Episaalomi 51:17).
Onkatu yotango okuhedha popepi naKalunga oku itaala kutya ngoye omulunde nowa pumbwa esilohenda nedhimopo lyoondjo kOmwa okupitila muJesus Kristus. Itaala kutya Jesus oye omuna gwaKalunga ngoka a hepekelwa oondjo dhoye, sho ali a alelwa komushigakano. Itaala woo kutya ito vulu okuninga sha mungoye mwene oshoka oonkondo dhoye odhili mu Jesus Kristus. Indila ombinzi yaJesus yidhime po oondjo dhoye.
Konima yoku itaala Jesus oshike tashi landula ko?
Konima yokuhempulula oondjo dhoye osha simana unene opo wu kambadhale noonkondo opo wu kale kokule niinima mbyoka hayi egululile saatana omweelo monkalamwenyo yoye, ngaashi:
- Uuntsa
- Ongeyo
- Onkone
- Oluhoko
- Oluhondelo
- Okuya koonganga oshowo okukutha ombinga miinima ayihe yokwiinyongamena iihongwathano/iimenka
- Ondumbo
- Iifundja yoludhi kehe
Kambadhala woo okudhiginina iinima mbika tayi landula, oshoka otayi nkondopaleke ekwatathano lyoye natate Kalunga
- Okudhimina po mboka ya yono kungoye oondjo
- Okudhiginina ehempululo lyoondjo
- Okugalikana aluhe, noku isiikila mombinzi yaJesus
- Okulesha Ombiimbeli yoye esiku kehe, opo wu koke pambepo
- Okukala kokule nuukolwi oshowo elongitho lyiingangamithi, oshoka omadhiladhilo goye oga pumbwa okukala taga longo ethimbo kehe, osho Kalunga oha popi nangoye ethimbo kehe.
Mpoka to nyengwa pula ekwatho kOmbepo Omuyapuki, oteku kwatha notwemu thigilwa onga eli omukwathi nomuyakuli gwetu, Sakaria 4:6 “Oto ke shi vula, ihe hakoonkondo dhuukwiita nenge komatha goye mwene, aawe, okombepo yandje”.
Tangi unene sho wali wa lesha sigo opehulilo, ondi inekela oshinyolwa shika osheku yambeka!